Sch'il stadi pavlia las medias, daventian quellas medias statalas. Quai ha ditg Philipp Gut, editur e manader da fatschenta dal comité da referendum cunter la promoziun da medias en Svizra il mardi davant las medias. Il comité è da l'avis che promover las medias saja dal dretg constituziunal ennà nun-acceptabel, fallà e privlus.
L'artitgel 93 da la Constituziun federala prevesia in'instituziun da radio e televisiun che vegnia finanzià dal stadi. Las ulteriuras medias na sajan ni menziunadas en la Constituziun ni haja il pievel ina giada decis davart il subvenziunament da quellas.
«Sin donn e cust da purschidas pitschnas»
Ils iniziants dal referendum disturbi cunzunt che gasettas gratuitas e medias online gratuitas vegnissan sapientivamain exclusas da las subvenziuns. Cun quai cementeschia il stadi ils monopols da medias existents sin donn e custs da purschidas pitschnas sin basa privata ed iniziativas regiunalas, ha ditg Peter Weigelt, anteriur cusseglier naziunal da la PLD da Son Gagl e president dal comité da referendum.