L'ultim chantun da domicil sto pajar prestaziuns supplementaras

Quai ha decis il Tribunal federal en in cas d'ina dunna che retira talas prestaziuns en ina chasa da vegls en il chantun Turitg, ha dentant habità avant per in curt temp en il chantun Uri.

seniors e senioras da davos en sutgas cun rodas Bild in Lightbox öffnen.

Legenda da maletgs: L'ultim chantun da domicil sto pajar las prestaziuns supplementaras. Keystone

En il cas vai per ina seniora che ha abità fin il 2008 en il chantun Turitg. Suenter ha ella abità per motivs da vegliadetgna durant dus onns tar sia figlia en il chantun Uri.

L'onn 2010 è la seniora lu entrada en ina chasa da vegls en il chantun Turitg ed il 2012 ha ella inoltrà davent da là la dumonda per prestaziuns supplementaras. La vischnaunca turitgaisa n'ha dentant betg vulì pajar quellas e tarmess vinavant la dumonda al chantun Uri.

Il chantun Uri n'ha dentant er betg vulì pajar las prestaziuns supplementaras. Suenter la via tras pliras instanzas ha il Tribunal federal lura sustegnì la posiziun da la vischnaunca turitgaisa.

I na dependia er betg dal fatg che la dumonda per prestaziuns supplementaras saja vegnida inoltrada pir cura che la seniora eria gia en la chasa da vegls turitgaisa. Tenor la lescha sto l'ultim chantun da domicil pajar las prestaziuns supplementars.

Betg disfavurisar ils chantuns cun bleras chasas da vegls

Quella lescha duai evitar che chantuns cun bleras chasas da vegls e sumegliantas instituziuns hajan in disavantatg envers tals cun paucas instituziuns. Uschigliò stuessan quels cun bleras instituziuns pajar bler dapli ch'ils auters. Savens è l'entrada en la chasa da vegls numnadamain pir il motiv ch'ina persuna sto retrair prestaziuns supplementaras.

RR novitads 15:00