I è la 50avla giada ch'il suveran svizzer elegia ses Cussegl naziunal. Per ils servetschs dal parlament è quest giubileum la chaschun, da mussar l'istorgia ed il funcziunament dal parlament en in'exposiziun en il Käfigturm a Berna.
In focus è la motivaziun dals giuvens, e perquai datti en il rom da l'exposiziun era la pussaivladad per classas da scola da sez giugar da parlament.
Mo RTR n'è betg be s'occupà da quest'exposiziun, nus avain era fatg quints. Ina legislatura dura 4 onns, e dapi la fundaziun da noss sistem politic l'onn 1848 na datti en sasez betg temp avunda per 50 legislaturas. Pertge ch'i ha propi dà tantas legislaturas, quai ha RTR sclerì cun l'istoricher Bernhard Altermatt da l'Universitad da Friburg.
