Ils criminals n'èn betg mo profis mabain era laics che nizzegian ora las temas da la glieud. Questa metoda da far squitsch è fitg populara tar ils criminals, scriva il post federal d'annunzia ed analisa er segirar infurmaziuns (MELANI). Il bler codeschan ils criminals datas enguladas cun agid d'uschenumnads trojans ni ch'els surchargian ils servers.
Per puspè dar liber las datas codadas vulan ils criminals lura daners. Mintgatant smanatschian els era da publitgar datas sensiblas. Il post d'annunzia da la confederaziun recumonda da betg dar suatientscha a questas pretensiuns. I na saja betg da smirvegliar ch'il dumber d'attatgas saja creschì dapi ch'i dettia novas metodas da pajar online, sco per exempel Bitcoin.
Ospitals èn pertutgads
Las attatgas vegnian plinavant adina puspè optimadas. Uschia vegnian per exempel tramess e-mails da contos ch'èn pertutgads. Plinavant dettia era adina dapli attatgas sin ospitals nua ch'i è fitg dramatic sch'ils medis n'han tuttenina betg access a las datas dals pazients.
Perquai che questas attatgas en uschè profitablas datti era blers imitaders che tramettian be mails senza attatgar las datas. Els mettan sin la charta che blers han uschè gronda tema che quai tanscha gia per che las unfrendas pajan.
Attatga sin RUAG
Dà en egl è era l'attatga sin la firma d'armament RUAG l'entschatta da l'onn 2016. Tar in ulteriur culp pli grond è la banca da datas da la PPS stada pertutgada. Là en 500'000 adressas da mail vegnidas copiadas. Era pertutgà era la pagina d'internet da la gasetta «20 minutas».
RR novitads 12:00