La CS sa tegna vi da la strategia d’enfin qua

La banca gronda Credit Suisse vul era sut il nov schef da concern Tidjane Thiam sa tegnair vid la strategia d'enfin qua.

Il schef da la CS designà Tidjane Thiam. Bild in Lightbox öffnen.

Legenda da maletgs: Il schef da la CS designà n'ha anc ditg nagut davart in'eventuala adattaziun da la strategia da la banca gronda. Keystone

I na saja betg previs ina nov'orientaziun fundamentala, ha declerà il president da la CS, Urs Rohner, a la conferenza da medias. La banca haja la finamira da restructurar il chapital da l’investment banking en l'administraziun da facultad.

Il schef da la CS designà Tidjane Thiam sez, n'ha betg vulì s'exprimer davart in’adattaziun eventuala da la strategia da la banca.

Fatg puncts cun in pled per tudestg

Tidjane Thiam ha tegnì ses emprim pled sco novelegì CEO da la Credit Suisse per tudestg, franzos ed englais. Cun quai ha el procurà per ina surpraisa ed è sa distanzià da ses antecessur Brady Dougan che n'ha betg emprendì tudestg durant ses temp en Svizra.

«Jau ma legrel sin la Svizra»

Tidjane Thiam ha 52 onns ed è in dals emprims top-managers en Svizra cun pel stgira. Naschì è el en la Costa d'Ivur, è creschì si en Frantscha ed ha studegià là fisica e matematica. Enfin in putsch militar l'onn 199 ha el lavurà per la regenza da la Costa d'Ivur. Sinaquai è el s'engaschà per pliras assicuranzas en l'entira Europa - l'ultim tar la Prudential en Gronda Britannia.

«Thiam è in leader»

Il nov CEO saja in leader e quai dovria la Credit Suisse. Quai ha il president dal cussegl d'administraziun Urs Rohner accentuà oz. El haja gia fatg experientschas co bajegiar si novas fieras - surtut en l'Asia. En tge direcziun che Thiam vul diriger l'investment banking da la Credit Suisse vegn anc pir a sa mussar. Experts vesan ina schanza ch'el reducescha quest sectur, uschia sco la banca UBS ha gia fatg quai suenter la crisa da finanzas.