Filippo Lombardi, il schef da fracziun dal PCD, ha annunzià en il radio romand RTS ch'el veglia inoltrar en la sessiun da mars ina cuntraproposta a l'iniziativa da ses agen parti. Il midament fiss, d’introducir ina definiziun da lètg, che resguardass era partenadis registrads. Ma pertge precis quest midament?
La finamira centrala da "l'iniziativa cunter il chasti da la maridaglia" dal PCD è in’autra e fitg simpla: “In pèr maridà na dess betg pli pajar dapli taglias che in pèr nun-maridà”, declera Stefan Engler, cusseglier dals stadis e president da la PCD Grischun.
Dapi che l'iniziativa vegn tractada en il parlament federal dattan da discutar oravant tut passaschas lateralas dal text d'iniziativa. Uschia per exempel la definiziun tge ch'ina lètg è insumma. È quai propi exclusivamain ina "cuminanza da vita tranter um e dunna"? Questa definiziun na fa betg vegnir las ventgaquatter be ad organisaziuns per ils dretgs dad omosexuals.
Suenter ch'il Cussegl naziunal ha sbittà l'iniziativa e lantschà ina cuntraproposta or da tals motivs gia il december passà, datti uss la medema discussiun en las cumissiuns dal Cussegl dals chantuns.
Stefan Engler da sia vart è anc adina persvas che lur definiziun da la lètg na saja betg spezialmain conservativa, anzi correspundia quella a la chapientscha d’ina maioritad dal pievel. Per augmentar la schanza che la finamira centrala da "l'iniziativa cunter il chasti da la maridaglia" na va betg per las assas giu pervi da questa definiziun, saja strategicamain legitim da far ina cuntraproposta, di Stefan Engler.
I na sa tractia betg d'ina midada da valurs che la PCD exequescha qua, ma d'in pass furber per "finalmain pudair discutar davart il tema central da l'iniziativa", sco quai ch' ils exponents da la PCD decleran.
“A la fin dess pudair vuschar il pievel sch' el vul abolir il chasti da maridaglia u betg”, di Filippo Lombardi, “e betg sche la lètg saja ina cuminanza tranter um e dunna u tranter um ed um u tranter dunna e dunna.” Era schi saja atipic da lantschar ina cuntraproposta per l'atgn'iniziativa, mintgatant saja da curreger las discussiuns cun in cumpromiss, di Lombardi.
Il Cussegl federal ha la PCD cun ni senza cuntraproposta dal rest gia da sia vart. Il pievel po vuschar davart il project da votaziun definitiv il pli baud l'onn che vegn.
La cuntraproposta che Filippo Lombardi fa quint d’inoltrar, è anc adina pli datiers al text da l’iniziativa original. La cuntraproposta ch'è vegnida fatga dal Cussegl naziunal il december passà, na stritga be la definiziun da la lètg, ma integrescha era la pussibilità d’in’imposiziun da taglia individuala.