Curt e concis
- La gasetta «Blick» ha scuvert che la scheffa da La Posta Svizra saveva da las cugliunarias en la contabilitad. «Blick» sa basa sin ina notizia d'acta.
- Susanne Ruoff refusa però, ch'ella saja vegnida a savair da las reproschas avant il 2017.
- La scuverta ha chaschunà reacziuns en la politica. Intgins cussegliers naziunals pretendan consequenzas.
La gasetta «Blick» ha scuvert che la testa da La Posta saveva gia dapi il 2013 da las manipulaziuns en la contabilitad. «Blick» sa basa sin ina notizia d'acta. En la notizia, adressada a la scheffa da La Posta Svizra, discurrian ins betg d'acziuns illegalas, ins discurria dentant d'ina transcripziun da daners en la contabilitad.
Ruoff haja savì da nagut enfin il 2017
Sin dumonda da l’agentura da novitads SDA ha Susanne Ruoff però refusà d’avair gì enconuschientscha dal cas. Ella saja pir mez november 2017 vegnida a savair per l'emprima giada da las reproschas da l' Uffizi federal da traffic. Pir las examinaziun internas hajan lura purtà a la glisch ils affars illegals.
Pressiun politica sin la scheffa da La Posta
La politica fa uss squitsch sin la scheffa da La Posta Svizra. Plirs cussegliers naziunals pretendan consequenzas per Ruoff. Uschia ha il schef da la fracziun da la PS Roger Nordmann pretendì la demissiun da Ruoff en l'emissiun «Rendez-vous» da SRF. Ed er da la vart burgaisa èn vegnidas dumandadas consequenzas: Il cusseglier naziunal Ulrich Giezendanner dal chantun Argovia ha pretendì envers Radio SRF, che Ruoff vegnia suspendida enfin che las examinaziuns sajan terminadas – sche las renfatschas sajan correctas.
Uss ha il president dal cussegl d’administraziun Urs Schwaller surpiglia las investigaziuns.
Era cussegliera federala Doris Leuthard ha prendì posiziun tar l’affera: Ella è trumpada e pretenda che la chaussa vegnia sclerida dal tuttafatg. Tenor ella han las examinaziuns gia cumenzà.
RR novitads 14:00