Il Cussegl dals chantuns è seguì sia cumissiun da furmaziun ed ha vuschà cun 27 cunter 16 vuschs da prolungar il credit d'impegn en l'autezza da 124,5 milliuns francs. La maioritad è stada da l'opiniun che la purschida actuala da tgira d'uffants cumplementara na bastia betg. I cunvegnia dad investir en canortas, na far nagut vegnia la fin finala pli char.
Politichers dal center e da la sanestra han constatà, che la Svizra vegnia senza il program d'impuls en las stretgas quai che pertutga il sustegn da famiglias. I saja impurtant da pudair cumbinar famiglia e lavur. Als pleds stoppian perquai er succeder fatgs.
Program d'impuls stoppia esser limità
Sco gia en il Cussegl naziunal èn surtut exponents da la PPS e la PLD s'exprimì cunter la proposta. Tenor ils critichers saja quai ina cuntradicziun dad adina puspè ina finanziaziun da partenza. Plinavant na dovria cunzunt en citads ed aglomeraziuns nagins stimuls finanzials pli.
Incumbensa da chantun e vischnancas
Er il Cussegl federal è stà cunter ina prolungaziun da la finanziaziun da partenza per canortas. En emprima lingia saja quai l'incumbensa dals chantuns e da las vischnancas da procurar per avunda plazzas da canorta, ha ditg il minister per fatgs socials Alain Berset. La Confederaziun haja mo ina funcziun subsidiara.
Sustegn dapi 15 onns
La lescha federala per l'agid finazial per la tgira d'uffants cumplementara è ida en vigur il 1. da favrer 2003. Senza prolungaziun fiss quella ida a fin la fin da schaner dal 2019. Cun il program d'impuls ha la Confederaziun sustegnì dapi il 2003 da stgaffir 57'400 novas plazzas da canorta.
Ils custs per quest sustegn han fin uss muntà a radund 350 milliuns francs. Mintga nova plazza da canorta vegn sustegnida durant dus onns cun 5'000 francs. Per canortas d'uffants da scola datti per mintga nova plazza 3'000 francs durant trais onns. Sustegnids vegnan er structuras per la coordinaziun da la tgira en famiglias dal di.
RR novitads 12:00
