Per sclerir delicts pon las autoritads da persecuziun sco er il servetsch da spiunadi ordinar mesiras per survegliar il traffic postal e da telecommunicaziun. La Controlla federala da finanzas ha uss prendì sut la marella ils custs ed il niz da talas surveglianzas. I saja sa mussà, che la surveglianza da l'internet servia a sclerir delicts, scriva la Controlla da finanzas en in rapport.
Instruments pli chars per survegliar effizient
Cunquai che adina dapli traffic da telecommunicaziun è criptà – per exempel tar skype u whatsapp – vegnia il niz da la surveglianza però restrenschì. Tar datas criptadas è il cuntegn nunenconuschent. I po per exempel be vegnir eruì, cura ch'ina communicaziun è vegnida fatga.
E perquai ch'ina gronda part da la communicaziun survegliada è criptada, èsi probabel che las autoritads guntgeschan en grevs cas adina pli savens sin trojans da stadi, in instrument fitg char. Cunquai che las autoritads da persecuziun penala ston sa participar vi dals custs da surveglianza, pudessan ils meds finanzials per talas surveglianzas mancar en futur.
Finanziaziun sto vegnir reponderada
La Controlla da finanzas federala propona perquai da reponderar la finanziaziun da la surveglianza en l'internet. En auters pajais sa participeschia il stadi per gronda part vi da la finanziaziun da survegliar l'internet. Cun il sistem actual tema la Controlla da finanzas, che la polizia e la procura publica pudessan desister da mesiras investigativas nizzaivlas, perquai ch'ils daners mancan.
RR novitads 06:00