Il café da la damaun marvegl cun leger la gasetta? En ils centers e las aglomeraziuns è quai normal, là vegnan las gasettas er repartidas d'interpresas spezialisadas. Ma en las regiuns perifericas vegn la gasetta cun la Posta. E tut tenor ston ils abunents spetgar fin il suentermezdi avant ch'els pon pigliar la posta e cun quai er la gasetta ord chascha da brevs.
Quai sto midar, manegia uss er il Cussegl dals chantuns. Era en regiuns nua ch'i dat nagina spediziun matutina duai la Posta esser il pli tard las 12:30 en chascha da brevs.
Segunda moziun refusada
Nagina maioritad ha dentant ina segunda moziun da Candinas chattà che vuleva scumandar a la Posta svizra da spustar plazzas da lavur en l'exteriur. Cunquai che la Posta ha annunzià da betg cuntinuar tals plans, na dovri qua er naginas mesiras pli, hai gì num.
RR novitads 12:00