Suenter las prelecziuns d'emprova vegnian ils candidats per ina professura mess sin ina glista da rangaziun, declera Andreas Jucker, decan da la facultad filosofica a l'Universitad da Turitg.
La rangaziun fa ina cumissiun da nominaziun che consista da diesch persunas sut il preisidi da la directura d'educaziun dal chantun Turitg. Per la rangaziun quintian sper la prelecziun d'emprova er las lavurs scientificas.
Per part lungas contractivas cun ils candidats u las candidatas
«Questa glista va da la cumissiun tar la direcziun da l'Universitad e vegn anc ina giada controllada. La direcziun prenda allura si las tractativas cun la persuna sin igl emprim plaz.» Contractà vegn lura per exempel davart il honorari. Questas tractativas possian cuzzar ditg, uschia Jucker. Mintgatant possian ellas er far naufragi. Lura vegn contractà cun il candidat sin il segund plaz ed uschia vinavant.
Mund academic cun auter orizont da temp che quel economic
Quai saja la procedura normala che giaja bler pli ditg che quai ch'ins saja forsa disà da l'economia privata, uschia Andreas Jucker. «Là fan ins forsa in u dus discurs e finì. Tar ina professura ston dentant las habilitads scientificas ed ils mussaments da prestaziun vegnir examinads minuziusamain.» Suenter che las tractativas èn serradas giu va la proposta vinavant tar il cussegl da l'universitad.
En tgenina part da tut quest process che la tscherna dad in successur u ina successura da Clà Riatsch sa chatta actualmain, n'ha Jucker betg pudì dir.
RR actualitad 12:10
