Siglir tar il cuntegn
Inhalt

Svizra La PLD ha lantschà il cumbat electoral per il 2019

A la radunanza da delegads da la partida liberaldemocratica a Pratteln (BL) ha la presidenta Petra Gössi crititgà las partidas da la sanestra e da la dretga. Per las elecziuns dal 2019 è la PLD sa mussada optimistica da pudair augmentar lur vuschs e repeter il success dal 2015.

La presidenta da la PLD Petra Gössi a la radunanza da delegads a Pratteln.
Legenda: La presidenta da la PLD Petra Gössi a la radunanza da delegads a Pratteln. Keystone

A la partida socialdemocratica rinfatscha Gössi ignoranza en connex cun las mesiras da sustegn per la libra circulaziun da persunas cun l’Uniun europeica. A la partida populara svizra rinfatscha la president da la PLD d’agir senza responsabladad cun refusar il cumpromiss per il project da taglia 17. In tal NA pericliteschia plazzas da lavur ed la bainstanza da la Svizra, uschia Gössi.

Sa posiziunar cun la «visiun per la Svizra»

Ils delegads da la PLD han era discutà sur dal futur da la partida. Uschia han els da decider sur da set finamiras che duajan alura purtar il success. En la visiun stettia la patria en il center ed il motto da la PLD saja era «Nossa Svizra – nossa patria» ha ditg Gössi avant la radunanza da delegads a SRF.

La PLD è cunter l'iniziativa d'autodeterminaziun

La partida ha decis cun gronda maioritad da dir NA a l’iniziativa «dretg naziunal avant il dretg internaziunal». L’iniziativa vul, tranter auter, che la Constituziun stettia, en cas da conflict, sur il dretg internaziunal.
Areguard il segund project ha la PLD decis in cler GEA. Là vai per la lescha davart la surveglianza das assicurads socials. En cas da dubis pon las assicuranzas metter en ils detectivs socials.

RR novitads 14:00