Dapi plirs onns dettia sulettamain paucas acziuns da polizia che cumpiglian er il diever d’ina arma da fieu. Quai communitgescha la Conferenza dals cumandants da las polizias chantunalas. Il 2021 hajan ins dumbrà anc sis giadas in diever d’ina arma da fieu, l’onn avant eran quai anc stadas 12 giadas. Il 2021 è ina persuna morta tar in’acziun, quai èn duas damain ch’il 2020.
Era il taser han policists e policistas en Svizra duvrà pli pauc l’onn passà, 81 giadas cumpareglià cun 96 giadas 2020. Ed igl è l’emprima giada dapi tschintg onns ch’il diever da questas pistolas che dattan in impuls electric è sa reducì.