Sco La Posta, il sindicat Syndicom sco er l’associaziun da persunal Transfair han annunzià sajan las tractativas terminadas. Cun quel contract collectiv sa megliereschian las cundiziuns en la sparta famigliara, sco er tar la protecziun da discriminaziun. Il contract collectiv va en vigur il 2021 e vala per trais onns.
Dublegià il congedi da paternitad
Il nov contract da lavur fa cunzunt en vista a la famiglia concessiuns. Uschia possian dunnas prolungar il congedi da maternitad sper las 18 emnas existentas per sis emnas nunpajadas. Per ils babs vegnia il congedi da paternitad dublà, da duas sin quatter emnas, hai num en la communicaziun.
Plinavant duai er la protecziun da discriminaziun vegnir megliurada. Igl artitgel dad egualitad saja vegnì amplifitgà. Da nov cumpiglià quel er ina protecziun sin basa da l'origin, vegliadetgna e furma da viver.