Il parlament aveva approvà cun ina buna maioritad l’emprim pachet da mesiras per realisar la strategia d’energia 2050. In dals puncts centrals è da scumandar novas ovras atomaras e da promover energias regenerablas.
La PPS è dal maini che questas mesiras intervegnian memia fitg en tut ils secturs da la vita da mintgin. La proxima generaziun vegnia chargiada cun grevezzas enormas. Perquai saja impurtant che burgais, locataris, possessurs da chasas, automobilists e mastergnants possian prender posiziun en chaussa, scriva la PPS.
Diversas brantschas ed interpresas sustegnan il referendum da la PPS. Tranter auter GastroSuiss, Auto Svizra e Swissmem. Las duas pli grondas federaziuns tetgalas da l'economia na sustegnan dentant betg il referendum.
RR novitads 11:30