Suenter ina discussiun fitg animada han ils delegads s'exprimids cun 248 vuschs na, 5 gea e 3 abstenziuns cunter il referendum dal politicher socialdemocrat tessinais Nenad Stojanovic. Avant aveva gia la AUNS, l'acziun per ina Svizra independenta e neutrala, decidì da betg sustegnair il referendum.
Ina giada na e duas giadas gea
A chaschun da la radunanza da delegads ha la PPS er gist decidì las parolas per la votaziun dals 12 da favrer. Cun 228 cunter ina vusch refusa la PPS l'iniziativa che pretenda che persunas da la terza generaziun duain survegnir il pass svizzer a moda pli simpla. Gea di la PPS al fondo per las vias naziunalas ed il traffic d'aglomeraziun ed a la terza refurma da la taglia sin interpresas.
Pleds clers da l'anteriur cusseglier federal
«Il 2017 na dastgi betg dar ina cunvegna da basa instituziunala cun l'UE», ha ditg l'anteriur cusseglier federal Christoph Blocher durant la radunanza da delegads da la PPS en il Vallais. L'independenza da la Svizra saja en privel. Blocher ha fatg attent ch'ina tala cunvegna da basa avess per consequenza che l'Uniun europeica faschess las leschas per la Svizra, senza che la Svizra avessi da dir insatge en chaussa. La Partida populara svizra stoppia ultra da quai metter tras l'uschenumnada iniziativa d'autodeterminaziun (Selbstbestimmungsinitiative). Cun questa iniziativa vul la PPS metter la Constituziun federala sur il dretg internaziunal. Blocher vul ultra da quai dar nagina schanza a l'iniziativa «Vegnir ord las stretgas» - RASA ed a la cuntraproposta.
Durant la radunanza da delegads vul la PPS tranter auter decider schebain ella fa in referendum cunter la realisaziun da l'iniziativa cunter l'immigraziun da massa.
RR novitads 14:00