Siglir tar il cuntegn
cuntegn

Svizra La promoziun d'integraziun funcziuna – tenor rapport

Ils chantuns dovran ils daners da la Confederaziun per integrar fugitivs e persunas recepidas temporarmain a moda adequata ed economica. A questa conclusiun vegn la controlla da finanzas federala. I dat dentant anc potenzial.

Purtret d'in fugitiv
Legenda: Ils daners da la Confederaziun vegnan duvrads a moda adequata. Keystone

Per l'integraziun linguistica e professiunala da fugitivs paja la Confederaziun als chantuns ina pauschala d'integraziun. Fin uss muntava quella a 6'000 francs per persuna. La primavaira vargada èn chantuns e Confederaziun sa cunvegnids d'augmentar questa pauschala sin 18'000 francs. Uschia survegnian ils chantuns l'auter onn probablamain enturn 210 milliuns francs.

La controlla da finanzas federala ha controllà 30 cas puncto transparenza, effizienza e rentabilitad e quai en ils chantuns Argovia e Friburg. Tenor ses avis èn quels dus chantuns represchentativs per la situaziun en tut ils auters chantuns. E la controlla ha dà bunas notas als chantuns ed è vegnida a la conclusiun che la promoziun d'integraziun funcziunia. Tuttina dettia quai anc potenzial da meglierar.

Confederaziun duai guardar pli exact

Malgrà il resultat positiv vesa la controlla da finanzas en differents champs anc grond potenzial. Per exempel stoppian mesiras d'integraziun professiunalas da las persunas che retschaivan ina renta d'invaliditad vegnir meglieradas. Il medem valia er per l'organisaziun da curs intensivs da linguatg cun tgira d'uffants pitschens sco era l'instrucziun da linguatg per persunas che gudognan gia.

Plinavant cusseglia la controlla da finanzas da schlargiar la purschida da mesiras d'integraziun per migrantas e migrants ch'èn traumatisads psichicamain.

Era duai il secretari statal per migraziun survegliar pli ferm. El duai examinar regularmain sche tut vegnia fatg en urden tar singulas prestaziuns d'integraziuns che vegnan scrittas ora. Plinavant pretenda la controlla da finanzas in monitoring che pussibilitescha ina cumparegliaziun chantunala, cura ch'ils fugitivs entran il martgà da lavur e daventan economicamain independent.

RR novitads 06:00