Siglir tar il cuntegn
Inhalt

Svizra La PS pretenda ina campagna per la prevenziun da violenza

Las dunnas da la Partida socialdemocratica (PS) pretendan ina strategia svizra cunter la violenza envers dunnas ed uffants. Ellas han preschentà in plan da tschintg puncts.

Las dunnas da la PS vulan che la Confederaziun lantschia la campagna «Na munta Na».
Legenda: Las dunnas da la PS vulan che la Confederaziun lantschia la campagna «Na munta Na». Keystone

La brutalitad da l’attatga sin dunnas ha Genevra haja schoccà, ha ditg la co-presidenta da las dunnas da la PS Martine Docourt. Ma quai che saja capità l’emna passada a Genevra saja sulet ina pitschna part da la violenza cunter dunnas. Era la presidenta da la Juso Tamara Funicello ha accentuà che la violenza cunter dunnas a chasa saja in tabu e in problem gravant. Uschia vegnia en Svizra mintga duas emnas ina dunna mazzada tras ses partenari u ex-partenari.

La violenza ha ina schlattaina

Sco Funicello ha ditg vegnia la gronda part da la violenza commessa da umens. Uschia ha ella admonì las dunnas da las partidas burgaisas da betg sulet vesair ina debatta rassistica. Era d’autras varts è vegni ditg che la migraziun saja in problem, ma primarmain saja il problem igl um e betg sia derivanza.

«Na munta Na»

Las dunnas da la PS pretendan uss da la Confederaziun mesiras. Uschia stoppia vegnir lantschada la campagna da prevenziun «Na munta Na». Ma era las spartas da cussegliaziun e terapia per victimas da violenza stoppian vegnir megliuradas. Cunzunt dovria quai dapli daners per chasas da dunnas che la purschida possia vegnir engrondida.

RR novitads 12:00