Siglir tar il cuntegn

Header

cuntegn

Svizra La qualitad da schurnalissem en Svizra patescha

In studi davart la cuntrada mediala en Svizra dat bunas notas a las emissiuns d'infurmaziun da SRF. En general mussa il studi però che la qualitad dal schurnalissem patescha – er pervi dal squitsch da spargnar sin diversas redacziuns.

Il magazin da novitads «Echo der Zeit» dal radio SRF è per la segunda giada il meglier med d'infurmaziun en Svizra. Quai mussa il segund rating da qualitad da medias da l'Uniun qualitad da medias svizra. Sin plazza dus e trais èn l'emissiun da radio «Rendez-vous am Mittag» e «10vor10».

Tar las gasettas quotidianas ed online èn sin posiziun in la NZZ sco er Le Temps. La meglra gasetta da la dumengia è l'NZZ am Sonntag e tar las gasettas da pendularis e boulevard è lematin.ch sin l'emprim plaz.

Sguard pessimistic en il futur

Per il studi han scienziads da las Universitads da Turitg e Friburg examinà ils 50 pli impurtants titels da medias en Svizra. Els han controllà quant detaglià che las medias han rapportà da fatgs politics decisivs e sch'ellas han er declerà il context dals fatgs.

Il facit dal studi è, che la qualitad dal schurnalissem sa sbassa tendenzialmain. Ultra da quai n'hajan las chasas da medias anc nagin model per generar avunda entradas per lur products online. Il problem general da las resursas na saja anc betg schlià ed envers il sulet model che pudess gidar – la promoziun directa da las medias – dettia memia blera resistenza.

RR novitads 15:00

Artitgels legids il pli savens