Siglir tar il cuntegn

Header

cuntegn

Svizra La racolta da mel è ina da las mendras dals ultims onns

La racolta da mel d'avieuls da quest onn va probabel en las annalas sco pli nauscha dals ultims onns. Cun excepziun da Genevra e Vallais na cuntanscha nagin dals chantuns ina racolta sco l'onn passà.

La gasetta d'avieuls svizra ha analisà ina retschertga en l'internet nua che bunamain 885 apiculturs èn sa participads. Tenor questa analisa ha in pievel d'avieuls dà quest onn en media producì en tut 13,9 kilos mel. Era in mal on è stà l'onn 2014 cun be 14,2 kilos per pievel. L'onn da record il 2011 hai dà bunamain 30 kilos mel per pievel.

En intginas regiuns saja la racolta crudada el vair senn dal pled en l'aua. Tgi che haja racoltà il mel da la primavaira haja stuì far fitg adatg ch'il pievel na moria da la fom perquai ch'ils avieuls n'hajan chattà nagut en la natira. Da nutrir ellas spezialmain saja stà l'unica pussaivladad da spendrar ellas.

La stad è stada mala per ils avieuls

Cun en media be 6,2 kilos mel per pievel d'avieuls giascha la racolta dal 2016 anc ina giada per 1,3 kilos per pievel pli a bass ch'il mender onn d'enfin uss, 2014. Blers apiculturs che produceschian schon blers onns na possian sa regurdar d'uschè in mal onn.

La primavaira hajan ils blers chantuns anc pudì tegnair cun l'onn passà. Ma la stad cun blera plievgia hajan dentant be ils chantuns dal sid profità dal clima chaud. Quai sajan ils chantuns Grischun, Tessin, e Valais sco era Genevra. En tut ils chantuns saja la racolta stada per in bun tant mendra.

Ciclus da dus onns pudess purtar levgiament

La statistica da plirs onns mussa ch'ils onns cun in dumber spèr sajan buns onns cun bunas racoltas da stad. Ils onns cun dumbers pèrs sajan en intgins chantuns stads miserabels e en auters chantuns simplamain mals. Ussa vegn sperà che quest trend cuntinueschia l'onn proxim e ch'ils avieuls produceschian lura puspè dapli mel d'avieuls.

RR novitads 17:00

Artitgels legids il pli savens