Siglir tar il cuntegn
Inhalt

Svizra La sessiun da stad dal parlament è a fin

En tut han il Cussegl naziunal ed il Cussegl dals chantuns mess sut tetg 17 fatschentas.

Maletg simbolic: Microfons en la chasa federala a Berna
Legenda: La sessiun da stad dal parlament è terminada. Keystone

Cun las votaziuns finalas ha il parlament terminà la sessiun da stad. Tranter auter fatschentas dispitaivlas sco la refurma da la lescha davart la taglia d'interpresas III u la ratificaziun dal protocol da la libra circulaziun da persunas cun la Croazia.

La lescha davart la taglia d'interpresas III

Grondas discussiuns ha la refurma da l'imposiziun da taglia sin interpresas dà. Ella è vegnida approvada en il Cussegl naziunal cun 139 cunter 55 vuschs e duas abstenziuns ed en il Cussegl dals chantuns cun 29 cunter 10 vuschs e 4 abstenziuns. Questa lescha remplazza ils privilegis da taglia per interpresas da l'exteriur.

Libra circulaziun da persunas cun Croazia

Las duas chombras parlamentarias èn s'avischinadas en las tractativas per la cunvegna da libra circulaziun da persunas cun la Croazia. Sin proposta da la conferenza d'intermediaziun ha il Cussegl naziunal surpiglià la lingia dal Cussegl dals chantuns. Il Cussegl naziunal aveva votà cun 128 cunter 62 e 2 abstenziuns per extender la libra circulaziun ed il Cussegl dals chantuns ha approvà la fatschenta cun 40 cunter 2 vuschs e 2 abstenziuns.

Dapli daners per las vias

Dispitaivel è er stà il nov fond per vias naziunalas e traffic d'aglomeraziun NAF. Il Cussegl naziunal è da principi per quest nov fond ed ha perquai cumenzà la discussiun. En la debatta ha i dentant dà grondas differenzas. La finala han omaduas chombras approvà il nov fond.

Nagina lescha pli severa per reclama per tubac

Ina terrada ha i dà per il minister da sanadad Alain Berset. La chombra pitschna ha refusà il scumond da far reclama per tubac en ils kinos e sin placats. L'economia da martgà liber saja da valitar pli fitg che la prevenziun. Sco proxim decida lura il Cussegl naziunal. Sche lez refusa er la lescha da products da tubac sto il Cussegl federal anc ina giada sur ils cudeschs.

RR novitads 11:00