Siglir tar il cuntegn

Svizra La surdada da concessiuns resta en ils mauns dal Cussegl federal

Il Cussegl naziunal ha decis ch’il parlament na po betg avair l’ultim pled en chaussa surdada da concessiuns a la SRG/SSR. Quai cun 99 cunter 87 vuschs tar 4 abstenziuns. Uss sto il parlament decider las mesiras da basa da las concessiuns, il Cussegl federal decida alura ils detagls.

Plirs visurs da televisiun.
Legenda: Il Cussegl federal duai vinavant esser responsabels per surdar las concessiuns. Keystone

La gronda part dal parlament ha decis encunter la moziun che pretendeva ch’il Cussegl naziunal po prender influenza sin la surdada da las concessiuns.

Franar l’expansiun da l’SRG/SSR

Las promoturas ed ils promoturs per ina midada han argumentà che quai dovra dapli controlla tar l’SRG/SSR. Uschia na saja quai betg propi chapibel daco che la SRG porschia chaussas ch’ils privats possian era porscher, ha argumentà Natalie Rickli (PPS/ZH). E ses collega Thomas Müller (PPS/SG) ha fatg attent ch’il Cussegl federal controlleschia uschia la SRG quai che muntia che l’emettur saja facticamain in emettur statal.

Evitar ina influenza politica

Ils adversaris han perencunter argumentà gist il cuntrari. Uschia na saja la SRG nagina instituziun statala ma cun ina pli gronda influenza dal parlament vegnia ella tar in emettur statal. La PPS veglia per tut pretsch prender influenza sin la SRG, ha argumentà cusseglier naziunal Martin Candinas (PCD/GR). La situaziun autonoma da l’SRG saja il medem mument ina protecziun cunter las forzas populistas che vulan ina controlla da las medias.

La definiziun dal «Service Public»

En ina èn ils politichers a Berna perina: i vul service public. Ma sch'i va per la dumonda co ch'il service duai vesair ora cumenzan las discussiuns.

Il parlamentari grischun Martin Candinas cumbatta davantvart sch'i va per las infurmaziuns independentas ch'il Service Public duess porscher. Il sistem dad oz cuntenta al parlamentari.

In tic stratg vi e nan è il parlamentari Heinz Brand. Tenor el ston vegnir midadas in per raubas. Tut quai che saja pussibel da surlaschar ad emetturs privats duain els surpigliar. Ins stoppia studegiar e guardar nua ch'i dovria anc tut il Service Public. Manegià cun quai e plitost il service da l'SRG SSR. Cun quai n'è Heinz Brand dal tut sin lingia da sia partida. El è amez en. La PPS quella vul restrenscher il Service Public uschè ferm sco pussibel. Perquai che la lescha e l’idea dal service public na saja betg adattada al temp dad oz.

RR actualitad 12:00