La Svizra e l'Eritrea duain puspè lavurar ensemmen pli ferm

Il cussegl federal ponderescha da re-prender la collavuraziun da svilup cun l'Eritrea. Il focus politic è la repatriaziun da requirents d'asil renviads. Il Cussegl federal vesa cun quai in'emprim pass vers ina collavuraziun.

Purtret d'ina giuvna che porta la bandiera dal pajais en fatscha. Bild in Lightbox öffnen.

Legenda da maletgs: Eritreana che porta la bandiera dal pajais sin sia vista. Reuters

Ils programs da svilup en l'Eritrea eran vegnids sistids avant diesch onns. Er per l'avegnir quinta il cussegl federal ch'ina collavuraziun saja pussaivla mo sut tschertas cundiziuns. Sche l'Eritrea saja pronta per discurs en ina tala direcziun vegnia anc a sa mussar.

L'Eritrea stoppia procurar per meglieraments

Da vart da la regenza valia da sclerir sche las cundiziuns da basa per in program da svilup sappian vegnir realisads. Per il mument giaja be per programs limitads cun in budget da 2 milliuns francs.

La finamira saja da meglierar las perspectivas dals giuvenils en il pajais. Il cussegl federal spetga dentant era pass da l'Eritrea, cunzunt meglierar la situaziun dals dretgs umans e stentas en las spartas migraziun ed economia. Il Cussegl federal è dentant da l'avis ch'i vesi ora bain. La regenza da l'Eritrea haja ils ultims onns dà buns signals.

RR novitads 15:00