L’Organisaziun da cooperaziun e svilup economic en l’Europa crititgescha il consum en general en Svizra. 742 kilos rument per persuna ad onn saja da memia, scriva la OECD vinavant. Quai saja quasi il pli bler rument da l'entira Europa.
Il recicladi sto vegnir megliurà
Era sch’il recicladi en Svizra mussia in’effect positiv dettia qua anc puncts ch’ins po meglierar. Uschia cunzunt tar ils rument da construcziun e spazzadas. Dapli che 15 milliuns tonnas tal rument dettia ad onn en Svizra. La OECD è da l’avis che producents da material da construcziun stuessan surpigliar dapli responsabladad per lur rument.
Auas tschufragnadas
Era la qualitad da l’aua stoppia la Svizra megliurar. Per exempel vegni quella tschufragnada entras pesticids che vegnan duvrads en l’agricultura. Era tschufragnada vegni l’aua entras ils tegnairchasas e l’industria. Plinavant duess la Svizra proteger meglier la biodiversitad. Ella haja numnadamain ina da las pli autas cumparts da spezias e spazis da viver periclitads da tut ils pajais da la OECD.
Bunas notas survegn la Svizra per il bass consum d'energia en l'industria.
RR novitads 11:00