Siglir tar il cuntegn

Svizra La Svizra survegn in nov tunnel al Gottard

Il suveran svizzer di gea a la segunda fora tras il Gottard e quai cun 1'883'741 gea (57,0%) a 1'420'481 na (43,0%). Era ils 2 chantuns ils pli pertutgads dad in nov tunnel – Tessin ed Uri – han ditg gea.

Zweite Gotthard-Röhre

Project federal: «Änderung vom 26. September 2014 des Bundesgesetzes über den Strassentransitverkehr im Alpengebiet (STVG) (Sanierung Gotthard-Strassentunnel)»

 

  • GEA

    57.0%

    1'883'741 Vuschs

  • Na

    43.0%

    1'420'481 Vuschs

Suenter in cumbat da votaziun emoziunal e cuntravers han gudagnà ils aderents cun Doris Leuthard a la testa. Ils represchentants da l’iniziativa da las alps han survegnì ina tera schleppa.

Da tut ils chantuns svizzers han mo vuschà ils chantuns Genevra e Vad encunter la segunda fora per ils autos entras il Gottard.

Legenda: Guardar il video «Tant il Grischun sco la Svizra din gea al segund tunnel dal Gottard». Durada 5:28 minutas.
Or da Telesguard dals 28.02.2016.

Segirtad e solidaritad

Quai sajan stads ils arguments che han persvadì a las Svizras ed als Svizzers dad esser per ina segunda fora al Gottard, resumescha l’Agentura da novitads Svizra sda.

Per ils victurs na saja quai dentant nagina raschun da far patgific, din ils perdents. Ussa stoppian els accumplir lur empermissiuns e procurar per ch’i na dettia nagina lavina da tola al Gottard.

Il suveran svizzer saja stà solidar cun la populaziun dal Tessin, s’allegra il cusseglier dals chantuns Filippo Lombardi (PCD) envers Radio Rumantsch. Ch’era il chantun Uri ha votà gea saja positiv, di il president da la regenza tessinaisa, Norman Gobbi (Lega).

Aspectativas concretas da tuttas varts

Il PS ed ils Verds pretendan ina garanzia, ch’il traffic vegni manà era en avegnir mo cun 1 vial tras il tunnel e na betg cun 2.

I saja consequentamain da proteger las Alps e transportar la martganzia sin ils binaris, punctuescha la presidenta dals Verds, Regula Rytz.

Ils adversaris burgais teman uss il squitsch finanzial sin auters projects da vias. Che projects impurtants en las aglomeraziuns vegnian stuschads uschia, di il cusseglier dals chantuns, Konrad Graber (PCD). En pli saja vegnì discurrì en tut la debatta tar la votaziun massa pauc da las finanzas.

«Victoria da la raschun»

Quai è la reacziun da las partidas burgaisas. Ils Svizzers e las Svizras hajan chapì, ch’i na dettia nagina alternativa ad ina segunda fora tras il Gottard – uschia il cusseglier naziunal Thierry Burkart (PLD).

Il cusseglier naziunal e president da la societad da commerzi, Jean-François Rime (PPS), quietescha ils perdents da la sanestra. La tema, ch’ils autos passan sin 4 vials tras il Gottard na saja giustifitgada. El na sa vegni mai ad engaschar per ina tala pretaisa.

Il gea è ina cesura en la politica da traffic

Per l’emprima giada suenter il gea a l'iniziativa da las Alps l'on 1994 ha la populaziun Svizra vuschà per in augment da capacitad per autos en las Alps. Era sch’il tunnel projectà vegn rivi cun mo in vial vegni facticamain a dar in augment da capacitad.

RR novitads 18:00