Tar ils «Tschuggers» vallesans n’è nagut pli sco avant. Bax (David Constantin) è fugì dal Vallais ed ha laschà tut enavos per cumenzar ina nova vita a Berna sco vendider da smoothies. El ha laschà crescher ina barba e chavels lungs e va uss en terapia da gruppa per elavurar tut quai ch’è capità. Ses ex-collega da polizia Pirmin (Dragan Vujic) na lavura era betg pli sco policist mabain fa gist midada en ina villa ed ha survegnì cun sia dunna (Lena Furrer) in poppin.
Davos las culissas – Anna Fanzun
Anna Fanzun ha lavurà sco location scout, quai vul dir ella è ida a la tschertga da lieus per filmar, e sco manadra da producziun per la part da «Tschugger» ch'è vegnida filmada a Berna. Uschia era ella tranter auter responsabla per tut la lavur logistica ed ha stuì ir per permiss da filmar, contactar la polizia e preparar tut uschia, ch'il team da film ha pudì entschaiver a filmar cura ch'el è arrivà. Il team da film da «Tschugger» ha en las emprimas duas staflas filmà oravant tut en il Vallais. Ussa a Berna saja però in zic auter.
En il Vallais èn els disads da pudair far tge ch’els vulan. Qua hai jau schon stuì pitgar sin maisa e dir – uss essas a Berna, qua datti reglas!
Tut en tut saja il plan da filmar stà tactà fitg stretg ed els hajan filmà cun dus teams parallel. Els hajan lavurà fitg spontan e fatg lungs dis. Il team da «Tschugger» haja dimena manà lur «groove vallesan» ch'exista en la seria era davos las culissas tar la lavur sin il set da film.
