Il label duai gidar als purs da vender meglier lur products da vatgas cun corna, ha ditg l'iniziant dal label, Michi Gehret, il president da l'Uniun vatgas cun corna.
Purs èn la colliaziun tranter la natira e l'uman. els na duain betg esser suttamess ad in squitsch economic.
Suenter che l'iniziativa per vatgas cun corna ha fatg naufragi, ha l'iniziant, Armin Capaul declerà che Michi Gehret saja vegnì cun la proposta dal label. Il label procuria per ina paja gista e sustegnia a moda concreta producents che mettian il bainstar da l'animal davant il profit economic.
Obligads a respect envers l'animal
Purs ed allevaturs che vulan duvrar il label per lur products èn obligads da desister da far giu corna a lur animals. Plinavant garanteschian quels era ch'i tractian lur animals e la natira cun il pli grond respect pussaivel e che la vatgas vegnian tegnidas uschè natiral sco pussaivel.
Plattafurma virtuala
Da chattar sajan ils producents da products da vatgas cun corna online. Ils allevaturs e purs certifitgads cun il label vegnan purtads en sin ina glista virtuala. Uschia pon ils consuments chattar il proxim furnitur cun il numer postal.