Siglir tar il cuntegn
Inhalt

Svizra Lais da fermada bain emplenids – malgrà la setgira

Il nivel da l'aua dals lais da fermada en Svizra è stà tar 72 pertschient il fanadur, e quai è normal per quest temp. Uschia quinta la branscha d’electricitad da pudair producir avunda energia per l’enviern che vegn.

Ina lai da fermada en ils culms.
Legenda: Il lai da fermada Emosson en il chantun Vallais. SRF

Ch’ils lais da fermada èn per trais quarts plains, haja da far cun la blera naiv da l’enviern passà. Quai a ditg il manader da fatschenta da la Federaziun svizra da l’economia d’aua, Roger Pfammatter, a l’agentura da novitads Keystone-SDA. E cun las temperaturas autas dal davos temp saja questa naiv lura era luada spert.

Nagina situaziun alarmanta

La finamira dals producents d’electricitad saja, ch'ils lais da fermada sajan puspè plains sin la fin da settember, ha Roger Pfammatter aschuntà. Questa finamira saja il mument realistica.

Exportar la stad ha pitschna impurtanza

Exportar electricitad na possian las ovras electricas svizras cun implants electrics da flum dentant betg questa stad. Per gliez na saja betg avund’aua avant maun, manegia Roger Pfammatter. Quai na saja dentant betg in grond problem, ils pretschs d’electricitad sajan uschè u uschia bass la stad.

RR novitads 15:00