Lantschà iniziativa per 4 emnas congedi da paternitad

Il parlament federal è cunter in congedi da paternitad pajà, ussa duai il pievel svizzer pudair decider. Oz è vegnida lantschada l'iniziativa per in congedi pajà da quatter emnas per babs. Quel duai vegnir finanzià sco il congedi da mammas ord la cumpensaziun dal gudogn.

Ils iniziants davant la Chasa federala a Berna. Bild in Lightbox öffnen.

Legenda da maletgs: Anc adina è la Svizra sin l'ultima posiziun tranter ils stadis europeics quai che pertutga il congedi da paternitad. MAD

L’iniziativa porta il num «Per in congedi da paternitad raschunaivel – per il niz da l’entira famiglia». Proponids vegnan 20 dis da vacanzas per babs suenter la naschientscha da lur uffants.

Reparter flexibel ils 20 dis

Tenor ils iniziants pudess il bab uschia sustegnair meglier mamma ed uffant(s), surpigliar il pensum d’endisar l’uffant a la canorta e gidar en il tegnairchasa. Uschia pudess in bab per exempel restar a chasa durant duas emnas suenter la naschientscha, e silsuenter reducir il pensum per 20 pertschient durant 10 emnas.

La chanzlia federala ha examinà il text da l’iniziativa e publitgà quel. Uschia pon ils iniziants cumenzar a rimnar las suttascripziuns ed han peda per quai fin il november 2017. Lantschà l'iniziativa han Travail.Suisse, las organisaziuns tetgalas d’umens e dunnas sco er Pro Familia.

RR novitads 11:00