Siglir tar il cuntegn

Svizra Las bancas sajan sin curs quai che pertutga las refurmas

Las bancas svizras sajan oz in toc pli resistentas encunter crisas ch'anc avant la crisa da finanzas d'avant 10 onns. Quai di il president da la banca naziunala svizra, Thomas Jordan. Las bancas grondas sajan sin buna via d'ademplir las pretaisas pertutgant l'agen chapital.

Purtret da Thomas Jordan.
Legenda: Thomas Jordan, il president da la Banca naziunala Svizra. Keystone

Cura che las mesiras decididas sajan messas enturn dal tut, vegnia la stabilitad dal sistem da finanzas meglierà vinavant. Plinavant hajan ils organs directivs sco era las autoritads da surveglianza ina meglra chapientscha per giuditgar ristgs.

Nagina prescha

Jordan ha plinavant confermà che la banca naziunala sa tegnia vinavant vi da sia politica monetara cun tschains negativs ed intervenziuns sin il martgà da devisas, quai malgrà ch'il franc è puspè vegnì marcantamain pli flaivel. Da midar uss insatge vid quai pudess metter en ristg la dinamica economica positiva, di Jordan

RR novitads 12:00