Dapli
Tant las fatschentas da tschains, da cumissiun sco er quellas da servetsch sajan creschidas, scriva la Raiffeisen. En la fatschenta d'ipotecas ha la banca registrà in creschament da 3,7 milliardas francs (l'onn passà +3,5 milliardas) sin total 154,6 milliardas francs, e quai malgrà in martgà d'immobiglias main dinamic.
Surpassà 200 milliardas francs
La facultad administrada da la clientella è s'augmentada per 1,6% ed ha per la prima giada surpassà la marca da 200 milliardas francs. Ils emprims 6 mais da l'onn è la facultad administrada creschida per 4,5 milliardas francs. En spezial ils chantuns Argovia, Berna, Fribourg, Lucerna e Neuchâtel sajan sa svillupads fitg. Era la summa da bilantscha è creschida fermamain (+13 milliardas francs) ed è medemamain per l'emprima giada sur 200 milliardas francs (201,3 mia.).
Raiffeisen ademplescha las pretensiuns
Precis avant in onn aveva la Banca naziunala svizra classifitgà la Raiffeisen sco relevanta per il sistem da finanzas svizzer. Cunquai tutga la banca en la medema gruppa sco las bancas grondas UBS e CS. Las pretensiuns regulatoricas per ina banca relevanta al sistem ademplescha la Raiffeisen senza problems. Uschia pretendan las reglas ina quota da chapital total da 15,6%, la Raiffeisen ha ina quota da 16,2%. Moody's ha era dauzà il rating per in stgalim sin AA2. Uschia è Raiffeisen ina da las pli segiras bancas senza garanzia statala.
La gruppa Raiffeisen guarda uschia cun optimissim moderà en l'avegnir. Sco quai ch'ella scriva quinta ella cun in resultat da l'onn en vischinanza da quest da l'onn passà.
RR novitads 06:00