Cassettas èn in product da temps passads. Blers n'han naginas dad ellas pli a chasa e tgi ch'ha anc cassettas a chasa tar quels fan ellas pulvra. Ils blers n'han er gnanc pli in radio u ina pussaivladad da tadlar cassettas.
Renaschientscha d'in medium nostalgic
Artists na fan betg pli ils gronds daners cun publitgar lur musica sin discs cumpacts u plattas. Tuttina datti adina daplirs musicists che dattan er ora cassettas quai malgrà ch'els fan musica moderna e commerziala. Uschia per exempel Metallica u er Justin Bieber. Ch'i vegnia er cumprà adina dapli cassettas conferma er Philippe Stuker da Cede.ch. Els hajan actualmain varga 1'300 cassettas en lur sortiment. La cumpra da cassettas restia dentant anc adina in product da nischa – els vendian per onn be intgins tschient cassettas.
In ch'ha er publitgà sia musica sin cassettas è l'artist svizzer Stereo Luchs. Ad el plaschia d'ina vart il product sco tal e da l'autra vart er la qualitad da la musica tut tenor cun tge medium ch'ins taidlia quella. Er da ses fans haja el survegnì buns resuns. Blers giaudian d'avair in product sin curuna.
RR actualitad 11:00