Siglir tar il cuntegn

Header

cuntegn

Las consequenzas da la guerra Fugitivas e fugitivs da l'Ucraina en Svizra

Avant sis mais ha cumenzà l'invasiun russa en l'Ucraina ed ha sfurzà milliuns persunas da fugir. L'Autcumissariat da las Naziuns Unidas per ils fugitivs (UNHCR) ha registrà fin oz 6 milliuns fugitivs e fugitivas. Quels han tschertgà protecziun en l'entira Europa. Ina pitschna part da quests 6 milliuns è vegnida en Svizra. Ina survista en cifras:

Status S e dumondas per protecziun

Il Cussegl federal ha decis il mars, var duas emnas suenter il cumenzament da la guerra, d'activar l'uschenumnà «status da protecziun S» per persunas da l'Ucraina. Cun quel po la Svizra porscher protecziun ad ina gruppa durant in temp da privel sco ina guerra. Ina procedura ordinaria d'asil n'è betg necessaria per persunas da quella gruppa. Fugitivs e fugitivas cun ils status S han sper il dretg da dimora per l'entira famiglia er il dretg da lavurar. Els survegnan alloschi e provediment medicinal.

Actualmain vivan 58'146 persunas cun status S en Svizra. Las pli bleras dumondas per protecziun èn vegnidas a l'entschatta da la guerra, durant ils mais avrigl e matg. Sur la stad èn las dumondas sa reducidas.

Bleras dunnas e blers uffants

Ina grafica che mussa che ina gronda parts da las persunas cun status S èn dunnas ed uffants.
Legenda: Persunas cun status S tenor vegliadetgna e gender. Uffizi federal da migraziun

Umens tranter 18 e 60, ch'èn abels per il servetsch militar na dastgan atgnamain betg bandunar l'Ucraina. Perquai è la maioritad da las persunas cun status S en Svizra dunnas ed uffants. Tenor la statistica d'asil dal fanadur èn dus terzs da tut las persunas ch'èn per protecziun en Svizra dunnas. Dals umens èn sur la mesadad pli giuvens che 20 onns. Ils uffants da famiglias cun quest status dastgan er ir a scola.

video
Status spezial per fugitivs ord l’Ucraina
Or da Telesguard dals 04.03.2022.
laschar ir. Durada: 1 minuta 23 Secundas.

Lieus da domicil

Persunas che survegnan asil u protecziun en Svizra vegnan repartidas als chantuns tenor la populaziun da mintga chantun. Consequentamain vivan ils pli blers en il chantun Turitg (11’014) ed ils pli paucs en l'Appenzel Dadens (112). En Grischun vivan tenor las cifras da l'Uffizi federal da migraziun dals 16 d'avust 1’369 persunas cun status S.

Circa 40’000 fugitivs da l’Ucraina vivan tar persunas privatas, quai èn var 60%. La solidaritad resta gronda tar la populaziun svizra – er in mez onn suenter il cumenzament da la guerra. Fin las vacanzas da stad han be 5 fin 10% Ucranais ed Ucranaisas stuì far ina midada. Ils auters pon restar vinavant tar lur albiertaders.

Situaziun da lavur

Persunas cun status S han il dretg da lavurar. Ils 31 matg ha la Confederaziun publitgà ina statistica da las qualificaziuns professiunalas da persunas cun status S. Ellas èn scoladas sumegliantamain u meglier en cumparegliaziun cun autras persunas immigradas:

  • 38,9% han professiuns scientificas 
  • 17,3% han professiuns en il sectur da servetsch u èn vendiders e vendidras 
  • 17,2% èn tecnicistas u persunal qualifitgà betg academic 
  • 10,7% èn lavurants da biro

Las cifras uffizialas da l'avust mussan che var 11% da las persunas tranter 18 e 64 onns cun status S han chattà lavur. Tenor il Departament federal da giustia e polizia èn ils pli gronds impediments per lavurar ina mancanza dad enconuschientschas linguisticas, la tgira d'uffants e problems da planisaziun.

Tuttina è la quota d'activitad da gudogn bunamain dubel uschè auta sco tar fugitivs e fugitivas renconuschidas u persunas prendidas si provisoricamain (6%).


Ucranais ed Ucranaisas cun status S lavuran en bleras differentas branschas. Bundant in quart lavuran dentant en la restauraziun ed hotellaria, 17% lavuran en la planisaziun, cussegliaziun ed informatica. Quai èn branschas cun mancanza da lavurantas e lavurants.

RTR actualitad 07:00

Artitgels legids il pli savens

Scrollar a sanestra Scrollar a dretga