Il ristg per cumportaments fraudulents saja considerabels. I sa tractia da blers daners. Tenor la lescha da CO2 dal 2013 ston importaders da carburant cumpensar parts da las emissiuns chaschunadas quai per regla cun investir en projects. Uschia quinta la branscha da stuair investir fin il 2020 radund 1 milliarda francs. Ils projects ston alura vegnir validads dal post da controlla ed pli tard sto l’Uffizi federal d’ambient approvar els.
Il post da controlla n’è betg independents
La controlla da finanzas ha uss constatà che quest instrument saja memia cumplex. Uschia ha ella er constatà mancanzas tar las lubientschas e controllas. L’independenza e la qualitad dal post da controlla stoppia vegnir megliurada considerabel, pretenda uss la controlla federala da finanzas. Uss stoppian tranter auter vegnir fixadas sancziuns, per controllar la qualitad sco er faussas indicaziuns dals realisaders da tals projects da cumpensaziun.
Projects per part cun dubla finanziaziun
La controlla federala da finanzas è vegnida activa tras ina annunzia da probabla corrupziun. Uschia duajan emploiads avair empruvà da influenzar las examinaziuns. Las reproschas n’hajan betg pudì vegnir verifitgadas, scriva la controlla federala da finanzas. Ma ì dettia tscherts problems cun il sistem vegl il «rap da clima». Uschia vegnian per part projects finanziads ch’eran cun il sistem vegl gia serrads giu.
L’Uffizi federal d’ambient scriva en sia replica che las recumandaziuns da la controlla federala da finanzas sajan ina buna basa per sviluppar vinavant quest instrument. Ellas correspundian cun las valitaziuns da la Confederaziun.
RR novitads 14:00