La chombra gronda crititgescha ch'il Cussegl dals chantuns haja decidì sut influenza da lobing massiv. Il Cussegl dals chantuns veglia evitar ina sentenzia da la dretgira federala per proteger interess particulars. Il pretsch pajan ils consuments.
La sanestra ha dentant proponì in cumpromiss. L'agir da la chombra pitschna saja inacceptabel. La proposta che cumpiglia ina reformulaziun da la clausula da la rait d'electricitad na saja betg impurtanta e na possia betg far naufragi. Cun la smanatscha da naufragi ha il Cussegl naziunal betg sa laschà metter sut squitsch ed ha refusà il cumpromiss da la sanestra cun 102 tar 86 vuschs e duas abstinenzas. Il tenor general è ch'il sustegn da forza idraulica tutgia betg en la lescha da la rait d'electricitad.
Cunquai ch'ils dus cussegls n'èn uschia betg vegnids perina davart d'in sustegn supplementar per la forza idraulica va la lescha uss en ina conferenza da cunvegnientscha. Ils commembers da las cumissiuns d'energia vegnan ad elavurar ina schliaziun e preschentan quella lura al parlament. Sch'ina da las duas chombras refusa la proposta fa l'entira lescha naufragi.
La clausula
Producents d'electricitad duain en general esser sfurzads da dar enavant ils avantatgs da pretsch proporziunalmain als consuments definitivs. La metoda dal pretsch median duai damai valair. Quai però cun excepziuns: Las interpresas duain pudair desister da quai sch'els furneschan energia regenerabla. Il dretg da desister da la metoda da pretsch median duai valair per atgnas ovras u per ovras colliadas en Svizra che survegnan nagin sustegn finanzial. Plinavant duai la repercussiun valair mo per tschintg onns. |
Nov: La clausula vala mo per atgnas ovras ed ovras colliadas en Svizra che survegnan nagin sustegn e mo per tschintg onns.
RR novitads 11:00