Svizra - Las istorgias dal Lai Rivaun

Serrar

01:32

video

Hanspeter Cadonau il Rumantsch a Quinten

Or da RTR dals 07.07.2016.

laschar ir. Durada: 1 minuta 32 Secundas.

00:54

video

Impressiuns a la riva dal Lai Rivaun

Or da RTR dals 07.07.2016.

laschar ir. Durada: 54 Secundas.

A la riva dal nord dal lai s'eleva bunamain sidretg la paraid da granit da la chadaina da muntognas Churfirsten. Tschella vart dal lai enconuschan ils blers dal punct da vista dal tren u da l'auto sin viadi da Cuira a Turitg. Tge porscha questa cuntrada enturn il Lai Rivaun? RTR dat in'egliada pli exacta e rapporta.

Quinten - accessibel sulet cun bartga

Insatge spezial è la vischnanca pitschna da Quinten, a la riva dal nord dal lai. Quinten cuntansch'ins be cun la bartga u cun ir davent da Walenstadt bunamain trais uras a pe. Era la suletta insla sin il lai – la «Schnittlauchinsel» – è ina tut speziala. Daco che l'insla sa numna uschia n'è betg enconuschent. Forsa savura ella da tschagugliuns, tgi sa?

Tgi stat pomai qua?

In abitant dal vitget Quinten é Hanspeter «Hampi» Cadonau, che è oriund da Vuorz. Gia dapi trais onns viva el a Quinten cun sia dunna. A Quinten ha el bler da far: Per exempel guardar da ses portgs pailus ed asens u tgirar sias vignas, nua che el producescha duas differentas sorts vin. Il vin da Hampi è, sco el di, in vin rumantsch e ha perquai era nums rumantschs: «La Randulina» e «Gion Gialet».

Walensee - Lai dals Welschs

Il num «Walensee» munta tant sco «Il lai dals Welschs», perquai ch'il lai era il temp medieval il cunfin tranter il territori rumantsch ed il territori tudestg (Alemans). Ils Tudestgs che na chapivan betg la lingua, schevan simplamein al rumantsch il «welsch», uschia ch'il lai ha medemamain survegnì quest num.

1 / 14

Legenda: Vista sin il lai. RTR, Silvana Degonda

2 / 14

Legenda: Giuven e vegl giauda il sulegl al lai, Walenstadt. RTR, Gian Carlo Candinas

3 / 14

Legenda: Andas sin il lai fotografadas davent la riva a Walenstadt. RTR, Gian Carlo Candinas.

4 / 14

Legenda: Funtauna a Murg. RTR, Silvana Degonda

5 / 14

Legenda: Ina famiglia da cigns a la riva da Murg. RTR, Silvana Degonda

6 / 14

Legenda: Vesta davent da Murg direcziun Walenstadt. RTR, Silvana Degonda

7 / 14

Legenda: Vista sin il vitget Quinten. Il vitg cun radund 50 abitants pon ins be cuntanscher cun bartga u a pe davent da Walenstadt (3,5 h). RTR, Silvana Degonda

8 / 14

Legenda: Vista davent amez il Lai Rivaun sin il vitget da Quinten. RTR, Silvanda Degonda

9 / 14

Legenda: Hanspeter «Hampi» Cadonau è cun ses bastiment sin via a chasa a Quinten. RTR, Silvana Degonda

10 / 14

Legenda: Baivegni a Quinten. RTR, Silvana Degonda

11 / 14

Legenda: Streglia stretga a Quinten. RTR, Silvana Degonda

12 / 14

Legenda: Vista davent la chasa da Hanspeter Cadonau a Quinten. RTR, Silvana Degonda

13 / 14

Legenda: Ils portgs pailus (Wollschwein) da Hampi Cadonau. RTR, Gian Carlo Candinas

14 / 14

Legenda: Hampi Cadonau posseda tranter auter er asens. RTR, Gian Carlo Candinas

In lai per pitschen e grond

Da dis da bellezza èn pitschen e grond, giuven e vegl a la riva dal lai Rivaun. I vegn fatg bogn u simplamain giudì il sulegl e la bella cuntrada. In u l’auter giauda il lai sin in pedalo u sin ina bartga a motor e cursescha sur il Lai Rivaun. Quels che na pon betg ir en l’aua frestga, giogan ping-pong u dattan ina partida bal a rait.

Durant in di da stad, sco oz, èn blers turists da chattar en las ustarias a la riva. I vegn giudì la bella survista sin il lai ed il sulegl che splendura en fatscha.

Pli baud veseva quai ora in zichel auter...

U almain era la situaziun da traffic ina autra sco ins vesa en la Tagesschau dals 26 da december 1975.

RR actualitad 12:00