Siglir tar il cuntegn

Header

audio
Decisiun dal Cussegl federal: Mesiras pli strictas da corona
Or da Actualitad dals 03.12.2021.
laschar ir. Durada: 2 minutas 51 Secundas.
cuntegn

Las novas mesiras Endadens vala in obligatori da certificat e mascrina

Il Cussegl federal preschenta las novas mesiras per franar la pandemia da corona. Il mardi aveva el tramess mesiras en consultaziun tar ils chantuns. Cusseglier federal Alain Berset è in pau surstà che chantuns che han annunzià ina situaziun tendida en ils ospitals, n'èn uss betg d'accord cun tut las mesiras.

video
Berset: « I drova era in certa coerenza tar ils chantuns.»
Or da News-Clip dals 03.12.2021.
laschar ir. Durada: 44 Secundas.

Las novas mesiras valan davent dals 6 da december fin ils 24 da schaner 2022. Las reglas novas per l'entrada en la Svizra valan gia davent dals 4 da december.

I na dat betg pli ina glista da pajais cun obligatori da quarantina tar l'entrada en la Svizra

Davent dals 4 da december dovra mintgin e mintgina che vul entrar en la Svizra in test da PCR negativ e sto repeter quel suenter quatter fin set dis. Persuenter na datti nagina glista da pajais cun obligatori da quarantina. Ils tests sto mintgin pajar sez. Exceptà da questa regla èn cunfinaris e cunfinarias.

Persunas betg vaccinadas ord pajais u regiuns da risico na dastgan betg entrar en Svizra per dimoras da 90 dis u pli pauc senza lavur.

Obligatori da certificat vegn schlargià

Da nov vala l'obligatori da certificat per tut las occurenzas publicas endadens ed per tut las occurenzas sportivas e culturalas da laics. L'excepziun per gruppas stablas da pli pauc che 30 persunas scroda. Occurrenzas dadora han davent da 300 persunas in obligatori da certificat. Fin uss eran quai 1'000 persunas.

L'experientscha mussia ch'il risico da s'infectar saja fitg grond en il conturn privat. Pervi da quai recumonda il Cussegl federal urgentamain d'utilisar ils certificats tar sentupadas privatas davent da 11 persunas.

video
Alain Berset: « Sajas precauts, oravant tut tar festas da famiglia.»
Or da News-Clip dals 03.12.2021.
laschar ir. Durada: 11 Secundas.

Da nov vala era in obligatori da mascrina dapertut nua ch'il obligatori da certificat vala. Cun excepziun dal rom privat.

2G facultativ

Indrizs publics ed organisaturs d'occurrenzas han la pussaivladad d'evitar l'obligatori da mascrinas. Quai cun sulettamain lubir l'entrada a persunas vaccinadas u guaridas a las occurrenzas.

Era firmas datgian introduzir 2G, di Berset. L'economia haja mussà grond interess vid questa mesira.

Tests d'antigen valan be pli 24 uras, betg pli 48 uras

Uschia duessan ils test sperts d'antigen esser pli exacts. Il temp ch'ina persuna cun in test negativ pudess esser infecziusa vegn reducida fermamain. Tests da PCR valan vinavant 72 uras.

Nagin obligatori da testar en scolas

17 chantuns eran cunter in tal obligatori. Il cusseglier federal Alain Berset accentuescha che la Confederaziun era explizit per in obligatori da tests en scola. Tests repetitivs sajan tenor il Cussegl federal in med effectiv per scuvrir infecziuns baud ed evitar da stuair serrar entiras scolas.

Limitaziuns da capacitad tar indrizs publics vegn schliada

Ina da las cundiziuns da la lescha da Covid-19 è ch'i na dastga betg dar limitaziuns da capacitad tar indrizs publics, manaschis ed era tar occurrenzas publicas u privatas sco che la populaziun che vul sa vaccinar è vaccinada. Suenter l'emna da vaccinar stoppian ins partir dal fatg, che quai saja il cas. Las limitaziuns per exempel per occurrenzas religiusas u ordadora vegnan schliadas.

Ils chantuns dastgan vinavant limitar las capacitads.

Recumandaziun urgenta da far homeoffice

Ultra da quai vala en manaschis en stanzas cun dapli ch'ina persuna in obligatori da mascrina. I na dat betg in obligatori per far homeoffice, quai per motiv ch'ils blers dals chantuns e dals partenaris socials eran cunter quel.

RTR novitads 15:00

Artitgels legids il pli savens

Scrollar a sanestra Scrollar a dretga