Siglir tar il cuntegn

Header

cuntegn

Svizra Las Perlas cun las truvaglias da Polo

70 onns ha noss Polo Hofer naziunal pudì celebrar dacurt. A questa chaschun udinsa in bardun truvaglias tut spezialas or da ses lung repertori, davent da la «Muschle» dals Rumpelstilz sur la «Ramona» dal Schmetterding enfin tar il «Mischus Charre» da la Schmetterband.

El saja mo in simpel «song- and dance-man», in entertainer pia, ha Polo Hofer ditg ina giada da sasez, ma sco tal um da la chanzun e dal saut ha il rockadur bernais cuntanschì renum naziunal, anzi, ins po dir che Polo saja oramai ina da las figuras musicalas las pli impurtantas da noss pajais.

Il bab dal «mundartrock» svizzer

Polo Hofer, il bab dal «mundartrock» svizzer.
Legenda: Polo Hofer en acziun. Keystone

Ses renum ha Urs «Polo» Hofer obtegnì tras lantschar e propagar la musica pop chantada en ses dialect bernais, l’emprim cun la gruppa pioniera Rumpelstilz durant ils onns ’70. En il ravugl da gruppas sco il Schmetterding ubain la Schmetterband ha el lura cultivà in rock multifar e cumpetent, viscal e spiertus tras plirs decennis enfin il di dad oz, colliond il blues afroamerican cun la melodia alpina. En quest senn ins po propi numnar Hofer il bab dal «mundartrock» svizzer. Sias chanzuns «Teddybär» e «Kiosk» èn veritabels semperverds da la musica pop indigena, chantads en scolas ed en ustarias, sia oda «Alperose» è perfin daventada ina spezia dad imni alternativ helvetic.

Ultima turnea

Gian Jegher ha organisà avant 18 onns in concert a Savognin
Legenda: Gian Jegher ha organisà avant 18 onns in concert a Savognin RTR, G. M. Maissen

En ils ultims onns ha Polo Hofer subì divers problems da sanadad – magari èn quels er in motiv per sia decisiun da smetter uss definitiv cun ses «geschmetter». La turnea actuala saja la davosa e l’album annunzià il vairamain ultimischem, ha il trubadur empermess.

Diversas contribuziuns spezialas tar RTR

RTR celebrescha dentant l’anniversari radund sco festa dad in babun musical anc en cumplaina furma, cun diversas contribuziuns spezialas en chaussa, en La Truvaglia ed en ils Semperverds dal glindesdi, sco er en Las Perlas dal venderdi, ils 20 da mars.

Artitgels legids il pli savens