Custà han las purschidas da la Spitex l’onn passà total 2,3 milliardas francs. Il maun public ha giu da purtar quasi ina milliarda da quests custs, communitgescha l’Uffizi federal da statistica. En media paja mintga client per a la purschida da servetschs a chasa da la Spitex 570 francs il mais.
Tenor la statistica han per l'emprima giada las chasas da tgira e d'attempads registrà ina reducziun da cussadents sin uss 149'000 persunas. Quai cun munta in lev minus da 0,4%.
Las uras prestadas èn enorm autas
En la sparta da la Spitex èn vegnidas prestadas 14,9 milliuns uras da tgira e 6,8 milliuns uras prestaziuns da tegnairchasa, scriva l’uffizi da statistica. En media ha mintga persuna duvrà ad onn 47 uras prestaziuns d’agid e sustegn a chasa.
Spitex ha adina dapli persunas independentas
L’onn 2016 è l’occupaziun en il sectur da la Spitex creschida per 5%, scriva l’Uffizi federal da statistica. La gronda part è engaschada tar instituziuns d’utilitad publica (36’000) e tar interpresas privatas (10’694). Il dumber da persunas che lavura sur sasezza en la tgira, s’augmenta en cumparegliaziun cun il 2015 per 13%.
Chasas da tgira han damain senioras e seniors
Lev damain persunas vivan en chasas da tgira. Il temp en media ch’ina persuna passenta en ina chasa da tgira munta a dus onns e tschintg mais. En cumparegliaziun cun il 2015 è quai in plus da 5%. Per tgirar quellas persunas han las chasas da tgira e d'attempads en Svizra incassà en total 9,9 milliardas francs.
RR novitads 12:00