Siglir tar il cuntegn
Inhalt

Svizra Las Viafiers federalas na vulan betg perder il tren

Ina colliaziun dad internet svelta e reservaziuns da plazs da seser en ils trens a gronda distanza. L’SBB va en l’offensiva per dapli confort en ils trens.

Il CEO da las Viafiers federalas, Andreas Meyer.
Legenda: Vul tegnair pass cun il temp, il schef da l’SBB, Andreas Meyer. Reuters

Ils gestiunaris da telefonia mobila hajan installà ulteriuras antennas lung la rait. Ed en ils trens hajan ins integrà amplifitgaders. Quai ha ditg il schef da las Viafiers federalas, Andreas Meyer, en in’intervista cun «NZZ am Sonntag».

En las proximas emnas vegnia la nova tecnologia testada e preschentada. Areguard l’internet gratuit haja il traffic a gronda distanza la prioritad. Sche questa offerta vala lura era per il traffic regiunal, ha Meyer laschà avert.

Sco en l’aviun

Plinavant duajan ils passagiers pudair tscherner e reservar ordavant lur plazs, sco en il kino o en aviuns. Las Viafiers federalas vulan era infurmar meglier lur clients davart trens plains e porscher ad els pussaivladads da guntgir. Per las alternativas pudessan els lura porscher bigliets pli favuraivels.

Anc pli punctual

Tge che duai anc sa meglierar è tenor il schef da las Viafiers federalas la punctualitad. Sin l’axa nordsid ed en la Svizra romanda na sajan ins anc betg là nua ch’ins veglia esser, uschia Meyer. Novs models da computer duain gidar a far progress. Grazia ad els duai en l’avegnir esser pussaivel da schliar pli svelt disturbis ed evitar ulteriurs retards.

RR novitads 9:00