El saja s'inscuntrà il 2016 duas giadas cun Gianni Infantino ordaifer ils biros da la procura publica, ha Michael Lauber declerà la mesemna a Berna a las medias.
Il procuratur public general ha communitgà enpli ch'el veglia candidar per ina proxima perioda d'uffizi dal 2020 enfin il 2023.
Lauber vul restar procuratur public general fin il 2023
Ils inscunters cun Gianni Infantino hajan gì lieu durant in temp, nua che Gianni Infantino na tutgava anc betg tar ils inculpads, è Lauber sa defendì. Ils discurs sajan stads necessaris sin livel surordinà per pudair sclerir dumondas tar l'entir complex da 25 proceduras pertutgant il ballape.
Lauber ha prendì posiziun la mesemna suenter ch'el era vegnì en la critica pervi dals dus inscunters persunals cun Infantino, gist suenter che quel era vegnì elegì a la testa da la FIFA. Ils inscunters eran vegnids publics tras ils uschenumnads «Football Leaks» – datas secretas, ch'èn vegnidas publicas ed han dà envista en divers affars ord il sectur dal ballape professiunal.
RR novitads 14:00