Siglir tar il cuntegn

Header

video
Reto Pfister: «Lavina da grondas dimensiuns»
Or da News-Clip dals 26.12.2019.
laschar ir. Durada: 19 Secundas.
cuntegn

Lavina ad Andermatt/Sedrun Mitschà cun la tema

En il territori da skis dad Andermatt/Sedrun è la tschertga da sparids terminada.

  • En il territori da skis dad Andermatt/Sedrun è ina lavina ida a val la gievgia avantmezdi vid las 10:50. Quai sin la pista dal Schneehühnerstock sin l'Alpsu.
  • Sis persunas sajan vegnidas salvadas, respectivamain hajan pudì deliberar sa sezzas ord la naiv. Duas dad ellas èn blessadas levamain.
  • Las forzas da salvament han terminà la tschertga. I na dat nagins sparids pli.
  • Per il mument resta la pista serrada.

Il di da Son Steffan è ina lavina sa distatgada survart da la pista dal Schneehühnerstock sin l'Alpsu. La lavina ha sutterrà persunas ch'eran vid ir cun skis. Duas persunas han las forzas da salvament pudì salvar cun blessuras levas, quatter ulteriuras èn vegnidas ora sezzas. Uschia ha infurmà la polizia dal chantun Uri. Tuttas sis persunas ch'èn vegnidas sutterradas da la lavina, sajan da naziunalitad svizra, uschia Reto Pfister da la polizia chantunala da l'Uri.

La tschertga è terminada

Las forzas da salvament han terminà la tschertga a las 18.15, sco la polizia chantunala ha communitgà. L'entir cugn da lavina mesira 60 sin 300 meters. Daco che la lavina è sa distatgada n'è anc betg enconuschent. I vegn anc investigà.

video
Qua è la lavina ida a val
Or da News-Clip dals 26.12.2019.
laschar ir. Durada: 21 Secundas.

Privel da lavinas considerabel – stgalim 3

Tenor l'Institut per naiv e lavinas a Tavau valia per la regiun dad Andermatt in privel da lavinas considerabel, stgalim 3. Ils privels principals sajan blera naiv nova e cuflads. Er en l'ulteriur territori da las Alps svizras vala per gronda part il privel da lavinas considerabel, stgalim 3.

RR novitads 12:00++

Artitgels legids il pli savens