Siglir tar il cuntegn

Header

audio
Sessiun speziala: DNA cuntegna bleras infurmaziuns nizzaivlas
Or da Actualitad dals 04.05.2021.
laschar ir. Durada: 4 minutas 39 Secundas.
cuntegn

Lavur da polizia Christophe Champod: «La DNA è ina perditga dapli»

Ha in delinquent chavels brins, blonds u forsa tuttina nairs? Tge colur dad egls ha quella? E da tge continent deriva la persuna tschertgada? Quellas infurmaziuns duain pudair vegnidas eruidas ord la DNA per la tschertga da persunas ch'han fatg in delict. Perquai duai la lescha vegnir adattada.

Las autoritads da persecuziun penala duain pudair duvrar dapli datas ord la DNA per tschertgar delinquentas e delinquents. Uschia duai la lavur d'investigaziun vegnir meglierada. Cun la lescha actuala èsi lubì a las investigaturas ed investigaturs da duvrar sulettamain l’infurmaziun davart il gener da la persunas tschertgada. Ord la DNA sa laschan dentant leger ora bler dapli infurmaziuns. Perquai duai la lescha vegnir adattada. Il resun en il parlament è per gronda part a favur da l'adattaziun.

Investigaziun pli effectiva

Las infurmaziuns supplementaras ord il profil da DNA sajan da vesair sco in’ulteriura perditga, di Christophe Champod ch'è professur per scienzas criminalas a l'universitad da Losanna. I duai oravant tut esser in sustegn per las investigaziuns.

Igl è ina sort perditga scientifica che po dar infurmaziuns supplementaras, co ch’in criminal u ina criminala potenziala pudess vesair ora. Dentant pussibiliteschan quellas infurmaziuns era d’excluder persunas che vegnivan avant suspectadas.
Autur: Christophe Champod Facultad da dretg, da scienzas criminalas e da l’administraziun publica a l’Universitad da Losanna

Sch'il delinquent lascha enavos al lieu da delict per exempel sang, sperma u chavels, duain investigaturs pudair duvrar en avegnir dapli infurmaziuns per survegnir in purtret da la persunas tschertgadas. I sa tracta da la colur da chavels, dals egls e da la pel sco era la derivanza da la persunas e la vegliadetgna da quellas. Quai duai dentant mo esser pussibel tar murdraretschs e violaziuns e be cun ordinaziun da la procura publica.

Betg adina 100%

Il profil da DNA saja in isegl dapli per la polizia. Ma i na saja betg in instrument che possia vegnir duvrà sco mussament davant tribunal, declera il professur. I sa tracta d'in isegl che duai gidar a chattar ils indizis tar la persuna culpanta. I saja dentant era dad esser precaut cun duvrar las infurmaziuns da DNA.

Tant sco quai che ina perditga pudess dir manzegnas, pudess era l’analisa da la DNA esser sbagliada. Per exempel: Sch'il test di che la persuna ha egls blaus, lura è la probabilitad tar 95% che quai è uschia. La quota da sbagl è tar 5%. Da quai sto la polizia esser conscienta. L’infurmaziun è ina infurmaziun statistica e na dat nagina segirtad da 100%. Perquai pudessan quellas infurmaziuns er manar las investigaziuns en ina faussa direcziun. Dentant è quai la lezia da la polizia, da savair ir enturn cun talas infurmaziuns. Cumissarias e cumissars vegnan scolads per quai.

RTR actualitad 11:00

Artitgels legids il pli savens