Siglir tar il cuntegn
Inhalt

Svizra Lavur per fugitivs per distgargiar l’agid social

Sche fugitivs e persunas ch’ins ha lubì provisoricamain da star en Svizra na vegnan betg integrads en il martgà da lavur, lura han ils chantuns e las vischnancas auts custs tar l’agid social. La Conferenza svizra da l'agid social (COSAS) propona perquai mesira concretas e pretenda ina maisa radunda.

Ils fugitivs duain sa gidar en segments sco en il sectur da construcziun, da schubregiar ma er en la tgira ed en ospitals.
Legenda: Ils requirents d'asil duain sa gidar per exemepl en il sectur da construcziun, da schubregiar u er en la tgira. Keystone

La Conferenza svizra da l'agid social (COSAS) è preoccupada dal grond dumber da fugitivs e da quels ch’ins ha lubì provisoricamain da star ch’èn durant in lung temp dischoccupads. Cunquai che la Confederaziun segireschia mo per in tschert temp l’existenza finanziala da quellas persunas, stoppia mintgamai l’agid social dals chantuns e da las vischnancas surpigliar quels custs. E quai haja consequenzas finanzialas gravantas per quels servetschs, uschia la COSAS.

Integrar en il martgà da lavur

Or da quest motiv vul ella che quellas persunas vegnan integradas uschè spert sco pussibel en il martgà da lavur. Pertge na saja quai betg il cas, lura saja il privel pli gronds che quellas persunas sajan in lung temp dependentas da l’agid social.

Per evitar quai, ha la COSAS elavurà in concept per l’integraziun en il martgà da lavur. Ella pretenda tranter auter in spert conclus d’asil, per ch’ils requirents d’asil possian uschè spert sco pussibel vegnids integrads en il process da lavur.

Curs d’introducziun en il martgà da lavur obligatorics

Impurtant saja ina sperta qualificaziun. Ils blers requirents d’asil sajan giuvens ed abels da lavurar, n’hajan dentant betg bunas qualificaziuns da lavur. Perquai pretendas la Conferenza svizra da l'agid social in curs d’introducziun en il martgà da lavur da plirs onns, che duai esser obligatoric per ils fugitivs.

Per che l’integraziun en il martgà da lavur grategia, stoppia dentant era l’economia sa gidar e sa participar activamain. Ultra da quai duain era ils obstachels administrativs per emploiar requirents d’asil vegnir sminuids.

RR novitads 15:00