Siglir tar il cuntegn

Header

Navigaziun

Pèr che marida
Legenda: Far fin cun il chasti da maridaglia e promover las dunnas en il mund da lavur - quai vul il model da la taxaziun individuala modifitgada. Keystone
cuntegn

Svizra «Lavurar sto render – era per famiglias»

In nov studi fa ina proposta co schliar la discriminaziun da taglia da pèrs maridads – e co ch'i duai render surtut per dunnas dad ir a lavurar.

Laschà far quest studi ha l’organisaziun da dunnas Alliance F ed Avenir Suisse. Quel vala sco cuntraproposta al project ch'il Cussegl federal ha preschentà. Lezza proposta vul schliar il problem cun in model da cumpromiss. Per pers maridads u en partenari registrà duai la taglia ina giada vegnir calculada sco oz, vul dir cun quintar ensemen las entradas d’omadus ed ina giada a moda individuala, vul dir mintgin per sasez. La summa pli pitschna duai lura valair.

Impedir novas discriminaziuns

Tenor Kathrin Bertschi, la co-presidenta d'Alliance F, chaschunia quest sistem novas malgistadads. Cunzunt tar pèrs betg maridads cun uffants. Cun lur proposta d'ina taxaziun individuala modifitgada, nua ch'il genitur che gudogna il pli bler profitescha dad ina tariffa reducida, possian ins eliminar quai ed il medem mument motivar il segund partenari, savens la dunna, dad ir a lavurar. Persuenter duvrassi dentant in sforz supplementar per stgaffir dapli plazzas per la tgira d’uffants ordaifer la famiglia, di Bertschi.

Cussegl dals stans discutescha proposta

Quest’emna tracta la cumissiun d’economia la proposta dal Cussegl federal. Kathrin Bertschi spera che lur proposta vegn era discutada e ch’ella chatta la via en in’eventuala cuntraproposta dal Parlament e Cussegl federal a l’iniziativa da la PCD cunter il chasti da maridaglia.

Mo i dat gia resistenza cunter la proposta. Per exempel da vart dal cusseglier dals chantuns cristiandemocrat Stefan Engler dal Grischun. Era el vul che dunnas poni r a lavurar sch’ellas vulan e na ston betg far dependent quai dal sistem da taglia. El vesa dentant en ina taxaziun communabla dals pèrs dapli avantatgs che dischavantatgs. Per exempel fissi difficil da fixar a moda correcta las differentas deducziuns da las qualas ils pèrs maridads profiteschian.

Co vinavant cun iniziativa da la PCD?

Per Engler è dentant il pli impurtant ch’il Cussegl federal dat ussa enconuschent co el vul cuntinuar cun l’iniziativa dal pievel «Per lètg e famiglia – cunter il chasti da maridaglia», davart la qual alas Svizras ed ils Svizzers ston anc ina giada decider.

Avant trais emnas aveva il Tribunal federal a Losanna annullà il resultat da la votaziun dal pievel dal favrer 2016. Tenor ils derschaders n’hajan las votantas ed ils votants betg gì las dretgas infurmaziuns per pudair sa far in'opiniun.

Stefan Engler preferiss ch’il Parlament federal pudess anc ina giada discutar l'entir project e tut tenor era chattar ina cuntraproposta valaivla.

RR actualitad 12:00 / 17:00