Siglir tar il cuntegn

Header

cuntegn

Lavurers da construcziun Sindicats acceptan contract collectiv: 150 francs dapli paja

Suenter pliras negoziaziuns ha la vart dals lavurers acceptà in nov Contract collectiv naziunal da lavur. La paja vegn auzada davent da 2023 per 150 francs al mais, la tariffa da paja minimala per 100 francs. Quai ha la societad d'impressaris uss anc d'approvar.

Suenter pliras rundas da negoziaziuns èn ils sindicats ed ils impressaris sa cunvegnids ad in nov Contract naziunal da lavur. Sindicats avevan pretendì in augment da paja. La chareschia e l'auzada da las premias da cassas da malsauns na vegnia betg cumpensada avunda dals impressaris. Ils 11. da november èsi per quai vegnì tar ina chauma sin ils plazzals da Turitg e Berna.

Ad Olten e Berna han delegadas e delegads dals sindicats Unia e Syna uss ditg Gea ad il contract ch'ils impressaris ed ils sindicats avevan elavurà. Els acceptan l'augment da paja da 150 francs, quai era tenor SRF ina da las pretensiuns centralas dals lavurers. Il nov contract duai valair davent da l'entschatta schaner per 3 onns. Ils 13 da schaner ha la societad d'impressaris anc d'approvar il contract.

Lavurers da construcziuns ils 11. da settember a Turitg tar ina demonstraziun per meglras cundiziuns da lavur.
Legenda: Lavurers da construcziuns ils 11. da settember a Turitg tar ina demonstraziun per meglras cundiziuns da lavur. Keystone

Plirs delegads dals sindicats han, malgrà ch'els han approvà, crititgà che l'augment da paja na saja betg pli gronds. Ed els hajan pretendì meglieraziuns pervia dal squitsch da temp sin ils plazzals svizzers.

audio
Per tadlar: las novitads da las 18:00
ord RTR Audio dals 11.12.2022.
laschar ir. Durada: 4 minutas 7 Secundas.

RTR novitads 18:00

Artitgels legids il pli savens

Scrollar a sanestra Scrollar a dretga