Ils lavurers na teman betg be per la vegliadetgna da pensiun da 60 onns. Els fan era quitads ch'ils temps da lavur vegnian flexibilisads. Uschia pudessi dar la stad dis da lavur da 12 uras. Il venderdi stat la proxima runda da tractativas tranter las partidas pertutgadas sin il program.
Contract collectiv scada
Raschun per l'entira discussiun è ch'il contract collectiv per lavurers da construcziun scada la fin da quest onn. Dapi il 2003 è garantì che lavurers da construcziun pon ir en pensiun cun 60. Uss datti dentant problems tar la finanziaziun, perquai che annadas cun bleras persunas vegnan pensiunadas.
Schliaziun pussaivla
En las contractivas d'enfin uss è vegnì definì, ch'ils lavurers ston pajar en futur 2,25% contribuziuns per pudair ir en pensiun anticipadamain. Quai èn 0,75% dapli ch'enfin uss. E quai vi da tut tschellas contribuziuns sco per exempel AVS. Ils patruns pajan gia uss dapli, numnadamain 5,5%.
Ils patruns èn er pronts da pajar dapli paja, numnadamain exact quels 0,75% ch'i dovra per cuvrir la contribuziun pli auta. Ils sindicats pretendan dentant in auzament da paja ch'è da sentir la fin dal mais en la bursa.
Dapli flexibilitad
Ils patruns èn pront da vinavant laschar ir en pensiun ils lavurers cun 60, senza ina sperdita tar la paja. Els pretendan lura dentant dapli flexibilitad. Ils lavurers duain lavurar da mars fin december fin 12 uras per di. Plinavant vulan els, che praticants duain lavurar fin quatter mais senza ina paja minimala.
RR novitads 10:00
