Siglir tar il cuntegn

Header

cuntegn

Svizra Lebrument sa retira sco president da las medias svizras

Hanspeter Lebrument sa retira sco president da l'Associaziun svizra da medias (ASM). El è stà 13 onns a la testa da l'associaziun.

Ses pli grond merit sco president da las medias svizras saja la promoziun indirecta da la pressa, di Hanspeter Lebrument sin dumonda dad RTR. La repartiziun da gasettas regiunalas e localas pli pitschnas vegn subvenziunada da la confederaziun mintg'onn cun 50 milliuns francs.

Cun 75 onns hai jau pensà ch'i saja plaunsieu temp da chalar.
Autur: Hanspeter Lebrument

En l'avegnir veglia el surtut far viadis pli lungs cun sia dunna, ch'el ha maridà pir avant bun in onn. Sin las fatschentas da la Somedia veglia el dentant era vinavant avair in egl, pertge là restia el president dal cussegl d'administraziun.

audio
Saira: Hanspeter Lebrument guarda enavos ed anavant
ord Actualitad dals 18.08.2016.
laschar ir. Durada: 2 minutas 19 Secundas.

Sco successur vegn proponì il vicepresident d'enfin uss, Pietro Supino. Per Hanspeter Lebrument saja stà impurtant da pudair persvader Supino da surpigliar il post. I saja in cas da fortuna per ils editurs ch'il schef da Tamedia sa mettia a disposiziun sco president. Supino è dapi il 2008 commember da suprastanza e dapi il 2010 vicepresident. Plinavant vegn il CEO da la Somedia Andrea Masüger proponì sco commember dal presidi.

Las elecziuns han lieu a la radunanza dals commembers ils 22 da settember a Lucerna.

RR novitadas 14:00

Artitgels legids il pli savens