Suenter avair recurrì senza success tar la regenza tessinaisa van ils anteriurs magistrats uss, tenor atgnas indicaziuns, ir davant Tribunal federal. Il project cugliunia, cunzunt la pretensiun che la polizia pudess pir intervegnir, sch'i saja gia vegnì commess in delict. Dasperas chastia il cudesch penal gia dapi il 2014 era preparativas per acts criminals u terroristics.
Dapli che 500 recurs entaifer tschintg dis
Plants sumegliants datti tenor la Partida dals pirats era en auters chantuns. Tenor quella haja dà passa 500 recurs entaifer tschintg dis cunter la lescha da las mesiras da polizia (PMT). Quai mussia, che blers na sajan betg cuntents cun las infurmaziuns davart il project da votaziun. Ils 13 da zercladur vegn la populaziun a decider davart la lescha.
Betg infurmà objectiv
En mintga chantun è tenor la Partida dals pirats vegnì inoltrà almain in recurs. Els fan valair, ch'en il cudeschet da votaziun na saja betg vegnì infurmà objectiv, uschia che las votantas ed ils votants na possian betg furmar ina clera opiniun. Ils facts sajan nunprecis ed impurtantas consequenzas legalas na vegnian betg menziunadas.
