Siglir tar il cuntegn
cuntegn

Svizra Lescha AVS: Sfida per la protecziun da datas

Duvrar il numer da l'AVS per identifitgar persunas era ordaifer las segiradas socialas saja in privel per la protecziun da las datas dals burgais. Da quest'opiniun èn las autoritads chantunalas e federalas per la surveglianza da la protecziun da datas.

Marschlos en cumbinaziun cun in computer
Legenda: Autoritads da protecziun da datas vesan in privel sch'il numer d'AVS vegn duvrà per l'identificaziun. Keystone

Il Cussegl federal vul lubir in tal diever a l'administraziun federala sco era als chantuns ed a las vischnancas. Finamira saja da simplifitgar la lavur administrativa. Da duvrar dapertut il numer d'AVS lubeschia d'actualisar infurmaziuns en bancas da datas e registers a moda automatica, sperta e cun pli paucs sbagls.

Sco quai che Adrian Lobsiger, l'Incumbensà federal per la protecziun da datas e per la transparenza, ha ditg oz a Berna, dettia dentant era gronds ristgs. Cun duvrar dapertut il numer d'AVS possia esser pussaivel da colliar las infurmaziuns da differentas bancas da datas. Cun smatgar sin in nuf pudessi esser pussaivel da chattar d'ina persuna infurmaziuns dal register penal sco era datas da taglia.

RR novitads 12:00